1. Barashada aqoon iyo caqliguu, Eebbe nagu beerey
2. Waa buro sidaa ruuxii midkood, baal ka soo galaye
3. Waa sidii bahal-u-roor ninkaan, buugga loo qorine
4. Buuraha inuu jiiri karuu, badowgu moodaaye
5. Allow yaa inuu baadi yahay, ba’aha gaarsiiya!
6. Barashaa cilmigu leeyahoon, bawsad lagu gaadhin
7. Ee baaxaddii mool iyo ballaar, badaha dhaafsiisan
8. Aan baabbaco muggeed khalqigu, baad ka soo gurannin
9. Inaan baahi loo qabin ayuu, badowgu moodaaye
10. Allow yaa inuu baadi yahay, ba’aha gaarsiiya!
11. Isagoon baarka sare tegin, budulna soo jeexin
12. Bog qudha midkii soo bartay baan, laga badbaadayne
13. Waxna biirsan maayoo isagu, waa is bidayaaye
14. Inuusan biidna garannayn, badowgu waa mooge
15. Allow yaa inuu baadi yahay, ba’aha gaarsiiya!
16. Fagaaraha kolkii loo baxoo, la isu baanaayo
17. Bisayl wacan ayaa xaajada, lagu baxnaanshaaye
18. Oo waliba lagu sii bilaa, bilicda suugaane
19. Inuu balow u soo boodo buu, badowgu doortaaye
20. Allow yaa inuu baadi yahay, ba’aha gaarsiiya!
21. Dadaal buuran baa runtii, lagu bullaalaaye
22. Goortuu barkimo qaatayoo, uu barqadi seexdey
23. Bakayluhu orodkii rooryoo, diin ka badin waaye
24. Wasiir inuu bahaystuu waqiis, badowgu doonaaye
25. Allow yaa inuu baadi yahay, ba’aha gaarsiiya!
26. Bugto weeye jaahilnimadu, beelihii dumine
27. Haddii aan bareer loo burburin, baabba’ baa xigiye
28. Waxa lagu bogsiin karaana waa, baahinta aqoone
29. Inuubase baylah iska yahay, badowgu waa mooge
30. Allow yaa inuu baadi yahay, ba’aha gaarsiiya!
31. Quruumaha adduunkaa bilqani, waa bartamayaane
32. Kuwiise boorka looga tago, baqdhoos bay noqone
33. Haddii aan bulsho nool la mudin, baatul noqo weeye
34. Inuu baaqa roon gartaba, badowga loo diidye
35. Allow yaa inuu baadi yahay, ba’aha gaarsiiya!
36. Kol hadday midnimo baaqatoon, loo birmanahaynnin
37. Ee bahnimadii qoys dhammaan, la isku boogaadsho
38. Sow bi’iwaynnay dantii guud, lama billaaweeynnin!
39. Sow barwaaqo inaan raadinnaa, nagama beenoobin!
40. Sow anigu baroor iyo tolow, boohin kuma waarin!
41. Sow sida biciidkii ugaadh, gooni uma baydhin!
42. Sow bannaanka inaan iska maro, buugga kama dooran!
43. Sow ciilku ima boorinoo, bowdo ima gooynnin!
44. Sow ballankaan dhulkayga u galay, kama bixiwaayin!
45. Sow aniga baroor iyo tolow, boohin kuma waarin!