…
Wax la yidhi, “guyaal hore
Bahal geed is-marisaa
Maqlay gobol Islaamoo
Wadaad gaasabbaxay raba”;
Gadh intuu sameeystuu
Kutub garabka soo sudhay
Soo gaadhyay beeshii.
Hadba dadabta loo goo
Hadba goolal loo loog
Badhi iyo leg loo gee
Gallad loogu roonaa,
Hoosna gaadhku kala socoy.
Gahangaha abaaraha
Sida weerka guuree
Hadba reer ku soo gaas
Hadba galab carraabaha
Masallaha gabboodkiyo
Hoos galbeedka soo dhigey
Gelin qudha maqnaanwaa
Guryihii ku fara baday
Galgal iyo xasarad keen
Gacan dhaafna lagu arag.
Gungunuuska beenta ah
Ku galgalay Quraankii
Guudaankii dhayiwaa
Goosan lumay bariinwaa,
Lagu baray geddiisiyo
Inaan Geeddi Baabbow
Naf gunaanadkeediyo
Garashada ku dheereeyn,
Misna gogosha loo badi.
Isna laba gar-daaqii
Hadba taako sii gudub
Ganacsiga ku sii durug.
Guuldarraa ka salaglee;
Galab buu ka kacay meel
Gegi laysu soo baxay
Dadkii joogey goobtaas
Kadin geel ah weyddii.
Warka Geeddi Baabbow
Gujo iyo faq hoosiyo
Isha laysku gaadhsii,
Waa dad soo gubtoo jabay
Dhegahay gufeeysteen.
Sii garooc hankiisii;
Gu’rin qaalinuu yidhi
Yaa godkiisa hoosiyo
Geysanaaya aakhiro?
Shirkii ruux garaaboo
Gacan taaga lagawaa.
Iyadana ka sii gudub;
Kuye, “gacallayaalow
Boqol shilin ha lay guro”.
Goroddaa la wada lulay
Ku go’ baana lagu yidhi.
Gonduhuu u sii degey
Kuye geed is-mariskii,
“Gini lagaca yaa hura?”
Laga gaabsay hadalkii.
Wuxuu yidhi, “galkiisiyo
Yaa kitaabka naga gada?”
“Gaw!” baa la wada yidhi
Go’aa boodhka laga tumey
La bannee gawaankii,
Dadku galab carraabaha
Badhba gees u siigee
Raabe-raabe loo guran
Golihii ku noqoy keli
Goobtaas la kala dhimey.
Isna Geeddi Baallow
Galalkiyo khamiiskiyo
Garangari Kitaabkii
Ged kalow u diga-rogey,
Miciyii gahaydhiyo
Daba goojinaysiyo
Gawsihii u sheellaa
Gibishii u duubnayd
Gashay saamihiisii
Gaalleemadii tuur
Gefi waa runtiisii
…
Waa tuduc ka mid ah maansada ’Gol Janno’ ee M. I. W. Hadraawi