Sun iyo Deebaaq
Ninka dulinka joogtaystayow, daawo maad lihide!
Dirirtiyo colaaddaad waddana, waa mid kuu darane
Ninkii dacar abuurtana berruu, dalaggeed goostaaye
Hadduu nolol damcaayana ma cuno, sun iyo deebaaqe.
Dibnihiisa uma quuro milil, dacar dhunkaaleede
Dagaal iyo sidoo kale ma galo, shay naftow darane
Colna lama dugsado iyo waqaa, cudurka daacuune
Waxaan kaaga digayana ogow, duugga waad arage.
Doog buu soo ceshaa daqar yaroo, meel dalooshadaye
Kumana daayo jeeruu ku dilo, ama ku daadduunsho
Duumaduna tabtaasay wadnaha, ugu darroortaaye
Inaad orod durdurisana ha sugin, doob kastood tahaye.
Ilaahay wuxuu diido waa, laga duceeystaaye
Waa laga durkaa wuxuu dikrigu, daaya uu yiriye
Adiguna waxaa damacsantahay, inaad dambowdaaye
Dawana ma laha ruuxii Ibliis, dalow ka tuuraaye.
Dowladnimo in lagu siiyo oo, nolol laguu daayo
Adoo dooxashiyo boob ka mid ah, doqommadii geeystey
Haddaa diiddo nabad oo dulmigii, wali daneeyneysid
Meel u dayo qaniinyada adaa, doortay waallida’e.
Doollarkaan ku waaliyo dhibtaan, damacu kuu geeystey
Diin la’aanta baa kuugu wacan, duunyo dhololkaane
Dabkaad maanta oogtaa ku gubi, maalmo dabadeede
Giddigoodna reer Degel ogoow, waa dil-sugayaale.
Dad waxaw ayaandaran nin diley, shacabki soo doortay
Dalkii gebi ahaantiina bahdiis, eexo ugu deeqey
Dabadeed dadkii kale ku direy, ee dab ugu dhiibey
‘Ku durduriya maatadiinna!’ yiri, uusna kaga daadshay.
Kol hadday dantiin tahay kufriga, aydan daynaynnin
Ama aad dabooshaan xaqiyo, Nebigii loo doortay
Ku dabaasha Haawiya Ibliis, baydin duufsadaye
Diintana Rabbigii soo dejey, baa xoog ku daaficiye.
Maxamed Xaaji Nuur Maxamed
E-mail: mhd.h.n@live.com